Mostrat për analizë toksikologjike të Agon Zejnullahut janë dërguar jashtë vendit, për shkak të mosfunksionimit të Laboratorit të Toksikologjisë në Institutin e Mjekësisë Ligjore në Prishtinë.

Ato janë dërguar të mërkurën në Maqedoninë e Veriut, raporton televizioni Tëvë1.

Analizat pritet të dëshmojnë për praninë e sasisë së alkoolit apo drogave që kanë mundur të jenë në trupin e 27-vjeçarit, i cili vdiq të hënën në orët e para të mëngjesit.

Gjaku është mostra kryesore e analizës toksikologjike.

Të hënën, në njoftimin e parë, Policia e Kosovës tha se Zejnullahu dyshohet se ishte nën ndikimin e alkoolit duke sulmuar automjete e kalimtarë kur u ndalua nga zyrtarët policorë.

Pamjet e publikuara në media, të incizuara nga dëshmitarët e rastit, tregojnë për dhunë joproporcionale të përdorur nga pesë zyrtarë policorë gjatë intervenimit për ta vënë në kontroll qytetarin.

Më vonë atë ditë, pra të hënën, Inspektorati Policor i Kosovës bëri të ditur për arrestimin e pesë zyrtarëve të përfshirë në rast. Pesë zyrtarët policorë ndodhen ende në ndalim policor.

Rasti ndodhet nën hetime nga Prokuroria Themelore në Prishtinë, e cila i ka kërkuar Gjykatës caktimin e masës së paraburgimit ndaj pesë të dyshuarve.