Instituti i Mjekësisë Ligjore ku mbahen prova të rëndësishme për vdekjet e dyshimta në Kosovë, u përfshi nga zjarri dy herë brenda këtij viti. Derisa hetimet vazhdojnë për të dyja rastet, si shkaktar të zjarrit zyrtarët e përmendën rrjetin elektrik. Organet e hetuesisë ende nuk kanë konfirmuar shkaqet e zjarrit në të dy rastet derisa nga Instituti thonë se dëmet nuk janë të mëdha.
Policia e Kosovës, në raportin 24 orësh është deklaruar për zjarrin që të martën ka përfshirë disa nga zyret e objektit të Institutit të Mjekësisë Ligjore.
Sipas raportit, zjarri është lokalizuar menjëherë nga zjarrfikësit, dhe nuk ka pasur persona të lënduar.
Policia tashmë ka nisur hetimet për këtë rast.
“QKUK – Prishtinë 21.11.2023 – 08:00. Janë përfshirë nga zjarri dy zyra në objektin e IML-së në QKUK. Njësiti i zjarrfikësve kanë lokalizuar dhe fikur zjarrin. Nuk raportohet për të lënduar, rasti në hetime nga njësitë relevante”, thuhet në njoftimin e policisë.
