Mirëpresim garancitë me shkrim nga Qeveria Kurti për mosdërgimin e FSK’së në Veri pa koordinim

Misioni i KFOR’it ka mirëpritur garancitë e fundit që i janë dërguar nga Qeveria Kurti për mosdërgimin e FSK’së në Veri. Në një përgjigje për Gazetën ata thonë se e mirëpresin respektimin e vazhdueshëm të Kosovës ndaj këtij zotimi.

“Sipas marrëveshjes NATO -Kosovë të vitit 2013 secili dislokim i FSK në Veri kërkon autorizim nga komandanti i KFOR’it” rikujtojnë nga Film City.

Tutje, ata theksojnë dialogun e rregullt që kanë me institucionet e Kosovës, përfshirë Ministrin Maqedonci i cili dje ka konfirmuar se ka dërguar letër në komandën e KFOR’it ku ka theksuar se do të respektohet zotimi për të mos e çuar FSK’në në Veri.

“Ne e mirëpresim respektimin e vazhdueshëm që Kosova ka ndaj këtij zotimi dhe garancitë e fundit me shkrim. Kjo pasqyron dialogun e rregullt të KFOR-it me përfaqësuesit e organizatave të sigurisë së Kosovës dhe të institucioneve të Kosovës, përfshirë z.Maqedonci” thuhet në përgjigjen e KFOR’it.

Ndryshe, komandanti i KFOR-it, Enrico Barduani, në një intervistë për RTK 2 të dhënë në dhjetorin e vitit 2024, kishte thënë se ministri i Mbrojtjes së Qeverisë Kurti, Ejup Maqedonci, ka dhënë një rizotim të shkruar për KFOR-in për respektimin e marrëveshjes së vitit 2013 në mes të NATO-s dhe Republikës së Kosovës për dërgimin e ushtrisë së Kosovës në Veri të vendit.

“Ky zotim më është konfirmuar, së fundi me shkrim nga ministri Ejup Maqedonci”, kishte deklaruar Barduani.

Sipas marrëveshjes NATO-Kosovë të vitit 2013, çdo vendosje e Forcave të Sigurisë së Kosovës (FSK) në veri të Kosovës kërkon autorizimin paraprak nga komandanti i KFOR-it.