LDK refuzon të votojë rezolutën, kërkon drejtësi të plotë dhe paanshme

Lidhja Demokratike e Kosovës (LDK) ka reaguar pas miratimit të rezolutës në Kuvend, duke theksuar se drejtësia nuk mund të trajtohet në mënyrë të pjesshme apo selektive.

Sipas komunikatës së LDK-së, Kuvendi ka “detyrim historik dhe politik të flasë me një zë të përgjegjshëm, të plotë dhe të drejtë për drejtësinë”, e jo përmes rezolutave që mbesin të pjesshme në përmbajtje dhe mesazh.

Partia thekson se mbështet fuqishëm gjykimin e drejtë dhe të paanshëm, në përputhje me standardet kushtetuese dhe ndërkombëtare, duke e cilësuar drejtësinë si një vlerë themelore të shtetit ligjor dhe orientimit euro-atlantik të Kosovës.

Deputetët e LDK-së kërkuan që rezoluta të përfshijë detyrimin institucional për zbardhjen e të gjitha vrasjeve të pazbardhura pas luftës, përfshirë edhe vrasjet politike. Refuzimi për ta përfshirë këtë, sipas LDK-së, e bën rezolutën “të paplotë dhe të mangët në mesazh”.

LDK ka njoftuar se do të vazhdojë të kërkojë drejtësi për të gjitha viktimat, procese të drejta e të paanshme, dhe një shtet që përballet me të vërtetën pa e instrumentalizuar atë politikisht.