Kosova hap ambasadë në Kuala Lumpur – Osmani: Një dritare e re bashkëpunimi me Malajzinë

Presidentja e Republikës së Kosovës, Vjosa Osmani, ka njoftuar hapjen zyrtare të Ambasadës së Kosovës në Kuala Lumpur, duke e cilësuar këtë si një hap të rëndësishëm për zgjerimin e pranisë diplomatike të vendit në Azinë Juglindore.

“Sot hapëm Ambasadën e Republikës së Kosovës në Kuala Lumpur, Malajzi,” ka shkruar Osmani në një postim në rrjetet sociale. “Një dritare e re për vendin tonë, me plot mundësi për bashkëpunim edhe më të thellë me Malajzinë.”

Presidentja theksoi rëndësinë strategjike të këtij zhvillimi diplomatik, duke e konsideruar Malajzinë si një partnere me rëndësi të veçantë në rajonin aziatik.

Ajo tha se kjo ambasadë do të shërbejë si një pikë kyçe për avancimin e interesave të qytetarëve të Kosovës dhe për fuqizimin e marrëdhënieve dypalëshe.

“Një prani edhe më e fuqishme diplomatike në një nga rajonet më strategjike në Azi. Një shtëpi më shumë e Kosovës, ku do të avancohen interesat e qytetarëve tanë, do të fuqizohen aleancat tona dhe do të mbrohet me vendosmëri shenjtëria e sakrificës së popullit të Kosovës për liri e shtet,” u shpreh Osmani.