Konflikt mes disa personave në lokalin e fshatit, dy të lënduar dhe dy në pranga në Bulqizë

Dy persona kanë mbetur të plagosur pas një konflikti në fshatin Trebisht të Bulqizës, ndërsa në pranga kanë përfunduar dy të tjerë. Policia njofton se konflikti mes disa personave ndodhi në një lokal të këtij fshati.

Shërbimet e Policisë bënë të mundur neutralizimin dhe shoqërimin në Komisariat të personave të përfshirë në konflikt.

Ndërhyrja në kohë e shërbimeve të Policisë parandaloi përshkallëzimin e një konflikti, që mund të sillte pasoja për jetën.

Policia vuri në pranga dy shtetas dhe procedoi penalisht 5 të tjerë, të cilët u konfliktuan fizikisht me njëri-tjetrin.

Shërbimet e Komisariatit të Policisë Bulqizë, pas marrjes së njoftimit se në një lokal në fshatin Trebisht, po ndodhte një konflikt midis disa shtetasve, shkuan menjëherë në adresën e dhënë.

Nga veprimet e shpejta rezultoi se gjatë një konflikti të çastit, për motive të dobëta, në ambientet e një lokali në fshatin Trebisht, shtetasit A.O., P.O., dhe H.O., janë konfliktuar fizikisht me shtetasit B.Z., E.D., P.D., dhe I .D., duke përdorur dhe sende të forta ndaj njëri-tjetrit.

Si pasojë e konfliktit kanë mbetur të dëmtuar shtetasit P.D., dhe I.D., të cilët ndodhen në Qendrën Spitalore Universitare Tiranë.

Në vijim të veprimeve procedurale për rastin, specialistët e Seksionit për Hetimin e Krimeve arrestuan në flagrancë shtetasit:

– A.O., 32 vjeç;

– P.O., 45 vjeç, për veprën penale “Plagosja e rëndë me dashje” kryer në bashkëpunim.

Materialet procedurale i kaluan Prokurorisë për veprime të mëtejshme.