Kërkesat për faljen e personave të dënuar, çfarë thonë nga Presidenca?

Zyra e Presidentes së Kosovës gjatë vitit 2025 ka pranuar gjithsej 60 kërkesa për falje të personave të dënuar.

Kështu bëri të ditur për Telegrafi, Bekim Kupina, këshilltar për media i presidentes Osmani.

“Prej tyre, gjatë vitit 2025 Komisioni për shqyrtimin dhe vlerësimin e kërkesave për falje ka shqyrtuar 56 kërkesa për falje të personave të dënuar. Në këtë numër përfshihen edhe 17 kërkesa të bartura nga fundi i vitit 2024, kurse në pritje për shqyrtim nga Komisioni janë edhe 21 kërkesa tjera të cilat janë pranuar në këtë fundvit”, tha ai.

Sipas tij, Komisioni me konsensus ka vendosur që nga këto kërkesa, të rekomandohen për falje dy persona të dënuar, prej të cilëve Presidentja e Republikës së Kosovës ka falur një person, kurse personi tjetër, gjatë periudhës së shqyrtimit të rekomandimit të Komisionit ashtu siç përcaktohet me legjislacionin në fuqi, siç janë njoftuar personit në fjalë veçse i është aprovuar lirimi me kusht.

Kupina tutje shtoi se gjatë këtij viti, nuk ka pasur rekomandime tjera për faljen e personave të dënuar nga ana e Komisionit.