Hoxhaj: Kosova po hyn në momentin më vendimtar për mbrojtjen e demokracisë

Deputeti i Partisë Demokratike të Kosovës, Enver Hoxhaj, ka reaguar ndaj zhvillimeve të fundit politike në vend, duke paralajmëruar se Kosova po hyn në një moment vendimtar për demokracinë.

Përmes një postimi në rrjetet sociale, ai ka deklaruar se vendi nuk po hyn në një proces normal politik dhe zgjedhor, por në një betejë që sipas tij është vendimtare për të ardhmen e demokracisë në Kosovë.

Sipas Hoxhajt, për vite me radhë institucionet demokratike janë dobësuar dhe shteti është përballur me procese që, sipas tij, kanë çuar drejt autoritarizmit.

Ai ka akuzuar koalicionin e vitit 2021 të udhëhequr nga kryeministri Albin Kurti dhe presidentja Vjosa Osmani, duke thënë se veprimet dhe vendimet e tyre politike kanë synuar “çmontimin e demokracisë dhe vendosjen e autoritarizmit” në vend.

Hoxhaj ka pretenduar gjithashtu se dështimi për zgjedhjen e presidentit nuk ishte rastësor, por i planifikuar.

“Dështimi i zgjedhjes së Presidentit ishte i planifikuar dhe i qëllimshëm, duke e lënë vendin që nga 5 marsi pa President dhe që nga 9 shkurti 2025 pa një Kuvend funksional”, ka shkruar ai.

Hoxhaj u ka bërë thirrje qytetarëve që të mbrojnë institucionet dhe Kushtetutën, duke theksuar se dobësimi i demokracisë, sipas tij, rrezikon edhe vetë shtetin dhe liritë e qytetarëve.