Haradinaj: Qeveria në largim ka shkelur dinjitetin e punëtorëve, Kosova me pagat më të ulëta në rajon

Kreu i AAK-së, Ramush Haradinaj ka thënë se Qeveria në largim nuk ka përmirësuar kushtet e punëtorëve në sektorin publik e privat.

Ai ka thënë se pagat në Kosovë mbesin ndër më të ulëtat në rajon.

“Qeveritë e përgjegjshme punojnë për të përmirësuar kushtet e punëmarrësve. Qeveria në largim ka bërë të kundërtën. Sot, paga minimale është një formë asistence, paga mesatare mezi mbulon jetesën, dhe në të dy sektorët; publik e privat, pagat mbesin ndër më të ultat në rajon.

Në vend të dialogut me sindikatat, kemi monolog qeveritar, përbuzje dhe arrogancë. Punëmarrësit publikë trajtohen pa dinjitet, ndërsa inflacioni rëndon gjithnjë e më shumë mbi qytetarin.
Edhe më 1 Maj, shohim më shumë retorikë, më shumë largime nga vendi, dhe gjithnjë e më pak shpresë.

Kjo është e vërteta e një qeverisje mashtruese! Urimi im për të gjithë punëtorët e Republikës së Kosovës në këtë 1 Maj është, paçit ditë më të mira!”, shkroi Haradinaj në një postim në Facebook