Gjesti nënshkruan kontratë me SGM Management dhe rikthehet në muzikë

Pas suksesit të madh në spektaklin Big Brother VIP Albania 4, këngëtari i njohur Gjesti po vazhdon të rritet dhe është gati për një rikthim të fuqishëm në skenën muzikore. Ai ka firmosur një kontratë me shtëpinë diskografike SGM Management, një hap që pritet të sjellë projekte të mëdha dhe një kapitull të ri në karrierën e tij artistike, shkruan Gazeta Sinjali.

Lajmi është bërë publik nga vetë këngëtari dhe shtëpia diskografike përmes një postimi në rrjetet sociale.

“Jemi shumë të lumtur të ndajmë me ju se Gjesti ka nënshkruar zyrtarisht kontratë me shtëpinë tonë diskografike nën menaxhimin e SGM. E mirëpresim atë dhe jemi shumë të emocionuar për atë që na pret në të ardhmen!”, thuhet në deklaratën zyrtare të SGM.

Pas një pauze disa mujore nga muzika, gjatë së cilës ishte i angazhuar intensivisht në dy formate të mëdha televizive: Big Brother VIP Kosova dhe më pas Big Brother VIP Albania, Gjesti është më i motivuar se kurrë për të sjellë projekte të reja muzikore.