Gjeneral Jashari pret zyrtarin e NATO-s – diskutohet avancimi i kapaciteteve të FSK-së dhe siguria në rajon

Komandanti i Forcës së Sigurisë së Kosovës (FSK), Gjenerallejtënant Bashkim Jashari, ka pritur në takim Përfaqësuesin Ushtarak të Mbretërisë së Bashkuar në NATO, Gjenerallejtënant Ian Cave.

Në fillim të takimit, Gjeneral Jashari i uroi mirëseardhje homologut britanik dhe e falënderoi për mbështetjen e vazhdueshme që Mbretëria e Bashkuar ofron për Kosovën, veçanërisht në aspektin bilateral dhe përmes trajnimeve e aktiviteteve të përbashkëta ushtarake.

Gjatë takimit, të dy gjeneralët diskutuan rreth të arriturave të deritanishme të FSK-së, si dhe për planin e tranzicionit, me fokus në ngritjen e kapaciteteve të plota operacionale. Komandanti Jashari theksoi përkushtimin që FSK të bëhet një forcë moderne dhe e aftë për të kontribuar në sigurinë rajonale dhe më gjerë.

Gjenerallejtënant Ian Cave e përgëzoi zhvillimin e FSK-së dhe ritheksoi mbështetjen e Mbretërisë së Bashkuar në procesin e profesionalizimit dhe integrimit të saj në strukturat ndërkombëtare të sigurisë, përfshirë ato të NATO-s.

Të dy palët gjithashtu shkëmbyen mendime lidhur me situatën aktuale të sigurisë në Kosovë dhe në rajon, duke theksuar rëndësinë e bashkëpunimit të ngushtë në adresimin e sfidave të përbashkëta.

Ky takim nënvizoi edhe një herë përkushtimin e ndërsjellë për avancimin e mëtejshëm të kapaciteteve të Forcës së Sigurisë së Kosovës, duke e pozicionuar atë si një komponent thelbësor të sigurisë euro-atlantike.