Eurovision 2025 ndryshon rregullat, finalistët nuk do të shpallen më një nga një

Organizatorët e Eurovision 2025 kanë vendosur të fusin një risi për mënyrën se si do të shpallen finalistët, duke synuar të rrisin tensionin dhe emocionet te publiku.

Sipas rregullave të reja, tre vende do të shfaqen në ekran në të njëjtën kohë, dhe vetëm njëri prej tyre do të shpallet si finalist në atë moment.

Shembull i mënyrës së re të njoftimit: në ekran do të shfaqen Suedia, Kroacia dhe Portugalia. Pas disa çasteve pritjeje, prezantuesit do të shpallin se Suedia kalon në finale. Ndërkohë, statusi i Kroacisë dhe Portugalisë mbetet i panjohur.

Kur të vijë momenti i shpalljes së finalistit të dhjetë, gjashtë vendet e mbetura do të shfaqen në ekran dhe njëri prej tyre do të shpallet si i fundit që kalon në finale.

Ky format ishte planifikuar që të përdorej edhe në vitin 2023, por për herë të parë do të vihet në zbatim këtë vit.

Nata e parë gjysmëfinale nis në orën 21:00. Nga 15 performanca, 10 do të kalojnë në finale. Përveç tyre, publiku do të ketë mundësinë të ndjekë edhe performancat e Italisë, Zvicrës dhe Spanjës, që janë të kualifikuara automatikisht në finalen e madhe.