Ekskluzive: Ky është zyrtari i Komunës së Gjakovës i arrestuar për marrje ryshfeti

Gazeta Sinjali mëson ekskluzivisht identitetin e zyrtarit që sot është arrestuar në Komunën e Gjakovës, nën dyshimin për veprën penale “Marrje e ryshfetit”.

Burimet tona bëjnë të ditur se bëhet fjalë për Kelmend Vula, 61-vjeçar, zyrtar në zyrën për regjistrimin e bizneseve në ARBK – Komuna e Gjakovës.

Ai dyshohet se ka kërkuar dhe marrë para nga një qytetar, për të rregulluar dokumentacionin dhe plotësuar formularin e aplikimit për hapjen e biznesit.

Rasti u zbulua pas një hetimi të zhvilluar nga Njësia Rajonale për Hetimin e Krimeve Ekonomike dhe Korrupsionit (NJRHKEK) në Gjakovë, e cila me urdhër të Gjykatës Themelore aplikoi masën e fshehtë “dhënia dhe marrja e simuluar e ryshfetit”.

Mëngjesin e së hënës, rreth orës 09:30, gjatë kontrollit pranë zyrës së tij, tek i dyshuari u gjetën dhe sekuestruan paratë që paraprakisht i kishte marrë nga i dëmtuari E. H.

Vula është shoqëruar në stacion policor, ku në prani të avokatit mbrojtës ka zgjedhur të mbrohet në heshtje.

Me aktvendim të Prokurorit të Shtetit, atij i është caktuar masa e ndalimit prej 48 orësh.