E reja nga Malisheva raporton dhunë nga bashkëshorti dhe vjehrri

Numri i rasteve të dhunës në familje në vendin tonë ka marrë përmasa shqetësuese. Çdo ditë raportohen ngjarje të tilla ku viktima zakonisht janë gratë dhe vajzat që përjetojnë dhunë psikike e fizike kryesisht nga bashkëshortët e tyre, raporton Gazeta Sinjali.

Një rast i tillë është raportuar më 15 korrik në Malishevë, ku një grua ka denoncuar bashkëshortin dhe vjehrrin e saj për sulm fizik, raporton Gazeta Sinjali.

Sipas informacioneve të Sinjalit, viktima L.M., rreth 26-vjeçare ka deklaruar se bashkëshorti i saj H.M., rreth 33-vjeçar dhe vjehrri Q.M., rreth 54-vjeçar kanë ushtruar dhunë fizike ndaj saj në banesën familjare.

E njëjta ka kërkuar mbrojtje dhe, pas marrjes në pyetje nga hetuesit, është dërguar për strehim në shtëpinë e prindërve të saj. Ajo posedon edhe raport mjekësor për lëndimet e pësuara.

Me urdhër të Prokurorit Kujdestar, është iniciuar rasti “Dhuna në familje”, ndërsa të dyshuarit janë liruar në procedurë të rregullt.

Hetimet janë në vijim për zbardhjen e plotë të ngjarjes.