Dyshohet për keqpërdorim të mbi 100 mijë euro në një çerdhe – arrestohet një person në Prishtinë

Policia e Kosovës ka zbuluar dyshime serioze për keqpërdorim të fondeve publike në një institucion parashkollor në Prishtinë. Hetimet e zhvilluara nga Njësia Rajonale për Hetimin e Krimeve Ekonomike dhe Korrupsionit kanë nxjerrë në pah praktika të paligjshme si përpilimi i listave fiktive të subvencioneve për fëmijë që nuk kanë ndjekur institucionin, duke shkaktuar dëme financiare të mëdha.

Siç njofton Policia, përveç kësaj, janë zbuluar raste të tërheqjes së parregullt të parave dhe blerjes së pajisjeve elektronike pa justifikim të nevojave të institucionit.

Sipas Policisë, dëmi i shkaktuar mund të kalojë shumën prej 100 mijë euro

Dy persona janë intervistuar nga autoritetet dhe njëri prej tyre është dërguar në mbajtje për procedura të mëtejme ligjore. Hetimet janë ende në vazhdim për të përcaktuar përgjegjësitë dhe vlerën e saktë të dëmit.