“Treni bullgar”, i njohur si fenomen i manipulimit të zgjedhjeve që u përdor për herë të parë në Bullgari, dyshohet se ishte i pranishëm edhe në zgjedhjet e mbajtura së fundmi në Kosovë të 9 shkurtit, raporton Gazeta Sinjali.
Partia Demokratike e Kosovës bëri një denoncim publik, duke akuzuar partinë aktuale në pushtet për vjedhje të votave në komunën e Gjakovës, çka bëri që Prokuroria të nisë hetimet lidhur me këtë rast.
Sinjali mëson se lidhur me këtë rast, sot do të hapen kutitë e votimit për numërim, e cila përpos KQZ-së, do të jetë e monitoruar edhe nga prezenca e hetuesve policorë.
Numërimi do të bëhet në sallën e sportit në Gjakovë “Shani Nushi”.
Kandidati për Deputet nga radhët e PDK-së, Hajdar Beqa përmes një postimi në Facebook, më 10.02.2025, pretendoi për parregullsi në procesin e votimit, në dy Qendra në Gjakovë.
Beqa ka thënë se, sipas vëzhguesve të PDK-së, dyshohet se në Qendrat e Votimit në shkollën “Zekeria Rexha” dhe “Fehmi Agani” ka ndodhur fenomeni i “trenit bullgar”, ku sipas tij partia në pushtet LVV-ja është mbivotuar.
“Sipas raporteve të vëzhguesve të Zgjedhjeve nga subjekti ynë ekziston dyshimi i bazuar që së paku në dy Qendra të Votimit: njëra në shkollën “Zekeria Rexha” dhe tjetra në shkollën “Fehmi Agani” në Gjakovë ka ndodhur fenomeni i ‘trenit bullgar’, nga ku rezulton të jetë e mbivotuar partia në pushtet. Ftojmë organet e Drejtësisë që të merren me trajtimin e këtij rasti dhe presim që shkelësit e Ligjit Zgjedhor të ballafaqohen me sanksionin penal që parasheh Kodi”, shkroi deputeti Beqa.
Ndryshe, “Treni bullgar” është metodë e manipulimit të zgjedhjeve me që rast, votuesve që janë të gatshëm ta shesin votën e tyre, apo që detyrohen nga frika të votojnë për ndonjërën parti ose kandidat, u jepen fletëvotime të plotësuara para se të hyjnë në vendvotim.
Pastaj, kur personi hyn në vendvotim e merr fletëvotimin e zbrazët, por e fut në kuti të votimit fletëvotimin e plotësuar qe ia kane dhënë paraprakisht dhe e merr me vete fletëvotimin e paplotësuar që e ka marrë në vendvotim.
