Çfarë e shtyu Izraelin të sulmonte Iranin dhe pse bash tash?

Spekulimet rreth një sulmi izraelit në qendrat bërthamore të Iranit kanë qarkulluar për vite me radhë, por ato u intensifikuan ndjeshëm ditët e fundit. Të enjten, mediat amerikane raportuan se një sulm i tillë ishte i pashmangshëm.

Izraeli ka qenë i shqetësuar se bisedimet midis SHBA-së dhe Iranit (të cilat kanë vazhduar që nga prilli) për një marrëveshje të re bërthamore mund ta lënë Iranin me një program bërthamor – diçka që Izraeli ka thënë se nuk mund ta pranojë në asnjë formë, shkruan BBC, transmeton Gazeta Express.

Ai ka paralajmëruar për vite me radhë për atë që percepton të jetë një kërcënim ekzistencial nga programi bërthamor i Iranit. Kryeministri i Izraelit Benjamin Netanyahu e ka bërë atë një temë të vazhdueshme, që nga mesi i viteve 1990.

Irani ka mohuar vazhdimisht se ka kërkuar armë bërthamore, duke këmbëngulur se programi i tij bërthamor është vetëm për qëllime paqësore dhe civile.

Por fuqitë perëndimore dhe agjencia globale bërthamore, Agjencia Ndërkombëtare për Energjinë Atomike (IAEA), nuk janë të bindura se kjo është e vërtetë. Të enjten, IAEA miratoi një rezolutë – për herë të parë pas 20 vitesh – duke deklaruar se Irani ka shkelur detyrimet e tij bërthamore.

Duke folur ndërsa sulmet filluan, Netanyahu tha se Irani kishte prodhuar materiale të mjaftueshme për – teorikisht – nëntë bomba bërthamore, diçka në përputhje me një vlerësim të fundit të IAEA. Irani, tha ai, kërcënoi “mbijetesën” e Izraelit.

Duket se, me vendimin për të sulmuar tani, Izraeli po shfrytëzon një mundësi: Irani ende nuk i ka rindërtuar mbrojtjet ajrore, të cilat u dëmtuan nga një sulm izraelit në tetor – dhe një sulm tani e paraprin raundin tjetër të bisedimeve për programin bërthamor, që pritet të zhvillohet të dielën.