Ish-kryeministri Avdullah Hoti ka shprehur habinë e tij me mënyrën se si e shpenzon buxhetin e Kosovës në ndërmarrjet publike, me qëllimin që t’i paguajë 24 paga për ata punëtorë që duan të largojen nga puna. Sipas Hotit ku largim po ndodhë nga Telekomi i Kosovës dhe fatkeqësisht kjo formë e subvencionimit me 24 paga për ata që duan të largohen nga puna po tregohet e dëmshme sepse po largohen kuadrot profesionale nga ndërmarrjet publike.
Hoti këtë formë të subvencionimit të ndërmarrjeve publike e ka shprehur përmes një grafikoni ku ka treguar ndryshimin prej vitit të kaluar në këtë vit.
Për më shumë ja postimi i Avdullah Hotit në Facebook:
Çudi me këtë Qeveri. E ka ndaluar “gjakderdhjen financiare” të ndërmarrjeve publike, por për periudhën janar-qershor 2022, i ka rritur për gjashtë herë subvencionet nga buxheti për këto ndërmarrje – nga 1.92 mil euro më 2021, në 12.39 mil euro sivjet.
Me gjasë, një pjesë e konsiderueshme e këtyre mjeteve po shkojnë për të larguar punëtorë nga puna në Telekom përmes skemës që ua paguan përnjëherë 24 paga mujore atyre që lëshojnë punën. Fatkeqësisht, kjo skemë po rezulton me ikje të kuadrove më të mira nga Telekomi, pasi kuadrot më të mira kanë më shumë alternativa në treg.
E vërteta është, fatkeqësisht, se taksat e qytetarëve po përdoren për të larguar punëtorë nga puna. Duket se “gjakderdhja financiare” – ky term morbid që u fut në diskursin politik – po i ndodh buxhetit të shtetit me vendime qeveritare.
Duke qenë se Telekomit po i ikin kuadrot, detyrimisht do të detyrohet të rekrutojë punëtorë së shpejti. A nënkupton kjo se po largohen punëtorët ekzistues për tu zëvendësuar me të tjerë nga partia në pushtet?! Çfarë politike e mbrapshtë është kjo?!
