AUV tërheq nga tregu formula ushqimore për foshnje të importuara nga Polonia

Agjencia e Agjencia e Ushqimit dhe Veterinarisë ka njoftuar se përmes Sistemit të Alarmimit të Shpejtë për Ushqim dhe Ushqim për Kafshë (RASFF) ka marrë informacion për praninë e substancës (toksinës) cereulide në formulat për foshnje Aptamil Pronutra 1, Pronutra 2 dhe Bebelac 1, me origjinë nga Polonia.

Për shkak të këtij rreziku, është kërkuar tërheqja e menjëhershme e këtyre produkteve nga tregu. Produktet janë importuar në Kosovë dhe kanë qenë në qarkullim para vendimit të datës 11.02.2026, me të cilin u ndalua përkohësisht importi i produktit Aptamil në vendin tonë.

“Duke qenë se niveli i rrezikut është vlerësuar si serioz, AUV, në bashkëpunim me kompaninë importuese, ka ndërmarrë masa të menjëhershme për tërheqjen nga tregu të produktit Aptamil, formulë ushqimore për foshnje, prodhuar nga Nutricia Zakłady Produkcyjne Sp. z o.o., Poloni, dhe i importuar në Kosovë nga UNION SH.P.K., Vushtrri”, thuhet në njoftimin e Agjencisë.

Njëherësh, AUV bën thirrje tek konsumatorët që të mos përdorin produktet Aptamil Pronutra 1, Aptamil Pronutra 2 dhe Bebelac 1 me datat e skadimit të specifikuara, por t’i kthejnë ato në pikën e shitjes.