Akuzat e VV-së, reagon Kushtetuesja: Asnjë institucion, parti politike s’mund të ndërhyjë në punën e Gjykatës

Gjykata Kushtetuese e Republikës së Kosovës ka reaguar ashpër ndaj deklaratave të fundit nga zyrtarë të lartë shtetëror dhe përfaqësues politikë, të cilat i ka cilësuar si të pamatura dhe të rrezikshme për rendin kushtetues.

Në një reagim zyrtar, Gjykata shpreh shqetësimin e saj lidhur me përpjekjet për të ushtruar presion ndaj punës së saj, duke theksuar se pavarësia e saj nuk është një privilegj i gjyqtarëve, por një shtyllë themelore e shtetit të së drejtës.

“Asnjë institucion, parti politike apo individ nuk mund të ndërhyjë në punën e Gjykatës. Çdo përpjekje për presion ndaj gjyqtarëve kushtetues përbën cenim të ndarjes së pushteteve dhe minon besimin e qytetarëve në sundimin e ligjit dhe demokracinë”, thuhet në deklaratë.

Gjykata ka theksuar se vendimet e saj mbështeten vetëm në Kushtetutë, praktikën gjyqësore dhe standardet ndërkombëtare për të drejtat e njeriut, ndërsa çdo përpjekje për të relativizuar apo paragjykuar këto vendime është konsideruar si “e papërgjegjshme dhe e dëmshme për zhvillimin demokratik të vendit”.

Duke bërë thirrje për respektimin e pavarësisë së saj, Gjykata Kushtetuese ka apeluar që të gjithë aktorët politikë dhe institucionalë të përmbahen nga deklaratat që cenojnë integritetin e gjyqtarëve dhe të kontribuojnë në forcimin e rendit kushtetues.

“Vetëm përmes respektimit të këtij parimi mund të garantohet një shoqëri e drejtë, demokratike dhe funksionale për të gjithë qytetarët e Kosovës”, përfundon reagimi.