Deputeti nga radhët e Lidhjes Demokratike të Kosovës, Agim Veliu, i ka reaguar kryetarit të partisë, Lumir Abdixhikut, për deklaratën e tij se do t’ua mbyll derën atyre që s’kanë më çka t’i japin kësaj partie.
Përmes një postimi në llogarinë e tij në Facebook, ai ka drejtuar kritika të ashpra ndaj Abdixhikut.
Sipas Veliut, Abdixhiku “ka hyrë nga dritarja në LDK”.
“Në vend se të marr përgjegjësi dhe bashkë me kandidatin e tij të kërkojnë falje për humbje në garë për Podujevën, Lumir Abdixhiku, që hyri nga dritarja në LDK, i paska marr çelësat e partisë që t’ua mbyllë derën e shtëpisë atyre që e ndërtuan dhe me sakrificë e mbajtën dhe e ngritën për 30 vjet.
Autokratit të katapultuar në krye të partisë, që paska kërcënuar me mbyllje dyersh e diferencime, ia bëj me dije se është anëtarësia e LDK-së ajo që vendos për vendin e secilit në parti dhe jo ai me vendime kundërstatutare”, ka shkruar Veliu.
Veliu ka thënë se Abdixhiku është “tepër i vogël” që t’ua mbyllë derën “gardianëve të vërtetë që e ndërtuan LDK’në e madhe”.
“Lumirit, që tinëzisht hyri në LDK dhe luan rolin e gardianit me çelësa në dorë, i them se je tepër i vogël t’ua mbyllësh dyert gardianëve të vërtetë që e ndërtuan LDK-në e madhe. LDK nuk është një lodër që për fatin e saj të vendosë një tinejxher politik. Prandaj, do të dështojë edhe misioni yt që trenin e LDK-së ta shndërrosh në një vagon, të cilin synon t’ia bashkangjesësh lokomotivës së kuqe”, ka shkruar Veliu.
Ndryshe, Kryetari i Lidhjes Demokratike të Kosovës, Lumir Abdixhiku, ka thënë se partia që ai përfaqëson, është demokratike, dhe mirëpret njerëzit e ri. Megjithatë, ai deklaroi se po ashtu LDK mbyll dyert për ata që s’kanë çfarë i japin më këtij subjekti.
”Çfarë është LDK e re, e re them në lidershipin që unë përfaqësoj. Një LDK proaktive në mendimin politik, që i njeh gabimet e veta, që hapë dyert për njerëzit e ri, që i promovon figurat më të mira të brendshme që i ka dhe që i mban përgjegjës pushtetin për veprimet e tyre politike që janë në dëm të qytetarëve”, tha Abdixhiku në Klan Kosova.
“Unë nuk besoj që ne duhet të vazhdojmë dekadën e katërt të LDK-së, me njerëz që s’kanë çfarë i japin LDK’së”.
Ndërsa kur u pyet nëse Agim Veliu pati ndikim në humbjen e LDK-së në Podujevë, Abdixhiku nuk komentoi gjatë, veçse u shpreh se për këto vendime në LDK, s’ka kthim prapa.
”Ne do të përmirësohemi herën e ardhshme që Podujevën ta rikthejmë. Për mua ka qenë një rajon me interes. Por, gjithë njerëzit e LDK-së që kanë pakënaqësi, duhet ta kuptojnë që treni s’kthehet prapa”.
”LDK ka njerëz të mjaftueshëm brenda strukturave të veta”.
