Abazi thotë se Rashiqi ia ‘‘ka siguruara 3-4 vota të Listës Serbe’’ Kurtit

Haki Abazi nga Aleanca për Ardhmërinë e Kosovës ka thënë se kryeministri i dorëhequr, Albin Kurti, po insiston në votim të fshehtë pasi sipas tij, deputeti Nenad Rashiqi, i ka siguruar 3-4 vota të Listës Serbe për kandidaten e VV-së për kryetare të kuvendit, Albulena Haxhiu.

Abazi tha se deputetët nga Lista Serbe janë në “peshkim” nga ana e Lëvizjes Vetëvendosje për të hyrë në zgjedhjen e kryetarit të kuvendit.

“Është e qartë që Rashiqi i ka siguruar 3-4 vota të Listës Serbe dhe Kurti po do që ta bëjë me Listën Serbe. Jam i bindur, 100% që janë deputetët e Listës Serbe ata që janë në peshkim nga ana e VV-së për të hyrë në zgjedhjen e kryeparlamentarit”.

“Nuk është hipotezë, është e qartë prej fillimit. Është diskutuar me Listën Serbe përmes Rashiqit që të bëhen pjesë”, tha Abazi në “DPT te Fidani” në Klan Kosova.

Tutje, ai akuzoi Kurtin se ushtron mbi deputetët e vetë të cilët tha se nuk guxojnë t’i thonë Kurtit se “çka është kjo maskaradë, 20 herë shkojmë në kuvend me të njëjtin rezultat”.