Konaku i Shaban Haxhiut

Kjo shtëpi është ndërtuar rreth vitit 1840 në Vushtrri dhe në fillim ishte pronë e Shaban Haxhiut.
Në qytetin e Vushtrrisë kishte dhjetëra shtëpi të këtilla, të cilat mbijetuan deri në fillim të viteve tetëdhjetë. Kjo shtëpi e ndërtuar në këtë stil, është e vetmja në qytetin e Vushtrrisë. Megjithëse është nën mbrojtje të trashëgimisë kulturore, asnjëherë deri tash nuk ka ndodhur ndonjë restaurim brenda dhe jashtë saj.
Deri në fillim të viteve shtatëdhjetë, një shtëpi tjetër e të njëjtit stil e ndante vetëm një muri në mes. Shtëpia ishte pronë e dajallarëve të mi, e cila dikur ishte ngritur nga Iljaz Aga, një pronar i madh i tokave në Vushtrri. Në katin e parë shquhej dhoma e zjarrit, e cila kishte një hapësirë të madhe ku gatuheshin ushqimet, derisa në të njëjtin kat gjendeshin edhe dy dhoma tjera.
Në katin e dytë shquhej çardaku i gjatë dhe i gjerë dhe në veçanti shquhej dhoma e pritjes, e cila gjendej në krahun e djathtë të saj. Dhoma kishte një hapësirë jashtëzakonisht të madhe, derisa tavani dhe muret e saj shquheshin nga ornamente prej druri, të punuara nga mjeshtërit më të njohur të kohës. Në katin e dytë ishin edhe dy dhoma tjera po ashtu të mëdha dhe një korridor i madh që çonte në drejtim të tyre.
Këto shtëpi dukeshin të bukura edhe për faktin, pasi secila prej tyre kishte oborre të mëdha prej së paku njëzet ari hapësirë.