A do ta votonte Fatmir Limajn për kryeparlamentar? Kështu përgjigjet Haradinaj

Pavarësisht se në seancën e sotme ishin të pranishëm 117 deputetë dhe kishte kuorum, përpjekja për zgjedhjen e kryetares së Kuvendit sërish dështoi.

Kreu i AAK-së, Ramush Haradinaj, ka përsëritur se Albulena Haxhiu nuk është figurë unifikuese dhe se nuk do ta votojnë për kryeparlamentare.

“Kjo kandidaturë po na pengon. VV duhet të gjejë një zgjidhje tjetër. Do të ishte edhe në interes të tyre të propozojnë ndonjë emër që i bashkon partitë, që e kalon situatën”, u shpreh ai pas përfundimit të seancës.

Ai theksoi se vendin nuk mund ta mbajnë të bllokuar pafundësisht dhe fajin për situatën e krijuar e la mbi partinë që s’ka shumicë:

“Mundemi me diskutu kush e ka fajin, por ai bie mbi atë që nuk e ka shumicën. Ne si opozitë duam të ecim përpara, por kjo nuk është gjendje normale për Kosovën”.

I pyetur nëse do ta votonin Fatmir Limajn për kryetar të Kuvendit, Haradinaj u përgjigj prerë:
“Nuk besoj që e merr votën e Aleancës.”

Situata në Kuvend vazhdon të mbetet e tensionuar dhe pa zgjidhje konkrete, ndërsa presioni për të gjetur një emër të pranueshëm për të gjitha palët po rritet dita-ditës.