Kurti, që pretendon se dje dha dorëheqje nga pozita e kryeministrit, e thërret një mbledhje të Qeverisë

Albin Kurti, i cili pretendon se të martën dha dorëheqje nga pozita e kryeministrit – gjë që disa parti dhe disa juristë nuk e njohin si të vlefshme – i ka ftuar anëtarët e kabinetit qeveritar që po ashtu thanë se kanë dhënë dorëheqje në një mbledhje të Qeverisë.

Mbledhja është caktuar të mbahet të orën 10:00, njoftoi Zyra e Kryeministrit.

Seanca konstituive e Kuvendit dje nuk vazhdoi më shumë se deri te procesi i votimit të raportit të komisionit të përkohshëm parlamentar për verifikimin e kuorumit dhe të mandateve. 52 deputetë votuan për këtë raport, 46 kundër dhe 11 abstenuan.

PDK-ja, LDK-ja dhe AAK-ja votuan kundër këtij raporti, pasi thanë se ndryshe do ta shkelnin ligjin. Thanë se Albin Kurti dhe anëtarët e tjerë qeveritarë që janë zgjedhur deputetë do të duhej të jepnin dorëheqje paraprakisht, sipas ligjit të ri për Qeverinë.

LVV-ja pretendoi se në komisionin e përkohshëm u paraqit një letër e dorëheqjes së Kurtit nga posti i kryeministrit, por këto parti nuk e konsiderojnë akt të njëmendtë dorëheqjeje. Në fakt kështu mendojnë edhe shumë juristë.

Sipas ligjit, Qeveria në dorëheqje vazhdon t’i ushtrojë përgjegjësitë e saj deri në zgjedhjen e Qeverisë së re nga Kuvendi, por me disa kufizime të përcaktuara .