Ish-ministri i Punëve të Jashtme, Enver Hoxhaj, e ka parë shqetësuese mos-përfshirjen e një njohjeje të ndërsjellë ndërmjet Kosovës dhe Serbisë në marrëveshjen e koalicionit të qeverisë së re të Bundestagut.
Hoxhaj, me anë të një postimi në ‘Facebook’, ka theksuar përfshirjen e çështjes së heqjes së vizave për kosovarët në koalicionin bashkëqeverisës gjerman, si dhe përkrahjen ndaj një marrëveshjeje mes Kosovës dhe Serbisë, shkruan lajmi.net.
“Në marrëveshjen e koalicionit gjerman nuk përmendet njohja e ndërsjellë, gjë që është një shqetësim serioz për Kosovën! Për më tepër, nuk thuhet asgjë për marrëveshjen obligative ligjore që duhet të arrihet në mes Kosovës dhe Serbisë, e cila fillimisht ishte propozim gjerman në nivel evropian!”, deklaroi mes tjerash deputeti i PDK-së.
“Çfarë thanë tri parti gjermane (Socialdemokratët, të gjelbrit dhe liberalët) në marrëveshjen e koalicionit qeveritar për Kosovën dhe Ballkanin, është e duhur dhe e pritur”, shtoi tutje Hoxhaj.
Ai ka thënë se ky është shqetësimi i vetëm i tij për qeverinë e re në raport me dialogun.
