Mjeku shqiptaro-amerikan, Rifat Latifi është emëruar sot Ministër i Shëndetësisë së Kosovës. Ministri i ri s’është emër i panjohur në Kosovë. Më herët, ai ka qenë edhe këshilltar i ish-kryeministrit Hashim Thaçi, raporton Express.
Një gjë e tillë dëshmohet edhe në faqen zyrtare të Zyrës së Kryeministrit.
Mbrëmjen 16 marsit të vitit 2009, Zyra e Kryeministrit kishte njoftuar se Latifi është emëruar këshilltar i jashtëm i Thaçit për shëndetësinë.
Në këtë njoftim thuhej se “emërimi i Dr. Latifit në këtë pozitë është konkretizim i angazhimeve në sektorin e shëndetësisë, që është një ndër prioritetet strategjike të Qeverisë së Republikës së Kosovës”.
“Dr. Latifi ka dhënë një kontribut të shquar akademik edhe përmes botimit të tetë librave dhe mbi 100 artikujve shkencor si autor ose bashkë-autor.
Dr. Rifat Latifi është një kosovar që ka kaluar jetën duke qenë i përkushtuar për mirëqenien e pacientëve në Kosovë dhe jashtë saj, si dhe me angazhime konkrete në funksion të reformimit të kujdesit shëndetësor në Kosovë”, thuhej në njoftimin e atëhershëm të ZKM’së.
Ndryshe, një muaj e gjysmë pasi Arben Vitia ka dhënë dorëheqje nga pozita e ministrit të Shëndetësisë, Qeveria e Kosovës ka emëruar Rifat Latifin ministër të ri të kësaj ministrie.
Këtë e ka bërë të ditur kryeministri Albin Kurti në një konferencë që po mbanë për media.
“Unë si kryeministër i Republikës së Kosovës posa kam nënshkruar vendimin për ministrin e ri të Shëndetësisë. Ministri i ri i Shëndetësisë në Qeverinë e Republikës së Kosovës do të jetë profesor doktor Rifat Latifi”, ka thënë ai.
Kurti ka thënë se Latifi të dielën ka ardhur në Prishtinë nga New York’u.
Sipas tij, ai ka kontribuar në vazhdisi në promovimin e shëndetësisë në Kosovë.
“Ai erdhi pardje nga New Yorku në Prishtinë. Ai ka studiuar për mjekësi në Universitetin e Prishtinës dhe pastaj ka përfunduar dy specializime, atë për kirurgji të përgjithshme dhe traumatologji e reanimacion në New York të Shteteve të Bashkuara të Amerikës. Përvoja e tij akademike dhe profesionale përfshinë qendra sptialore dhe universitete me emër në disa shtete federale të SHBA’ve”, ka shtuar ai.
Ndërsa, me të marrë detyrën e ministrit, Latifi ka thënë se bashkë me ekipin e tij do të angazhohen që në mënyrë afatgjate të ngrisin standardet mjekësore.
Ai me këtë rast ka premtuar edhe shtim të shërbimeve shëndetësore.
“Unë premtoj se ekipi im dhe unë do të angazhohemi me gjithë qenien që në mënyrë afatgjate të ngrisim standardet mjekësore, duke ngritur edukimin dhe trajnimin e të gjithë specializimeve si dhe ngritjen e aftësive të kapaciteteve njerëzore për hulumtime shkencore në shkencat mjekësore, sikur për mjekët ashtu edhe për infermierët dhe të gjithë punëtorët tjerë shëndetësorë. Me ngritjen e kapaciteteve njerëzore ne investojmë në ngritjen e kualitetit të shërbimeve dhe në këtë mënyrë shtojmë volumin e shërbimeve mjekësore në Kosovë. Me të ardhurat prej këtyre shërbimeve, ne riinvestojmë sërish në kualitet”, ka shtuar ai.
Ky është njoftimi i plotë:
Prishtinë, 16 mars 2009
Kryeministri i Republikës së Kosovës, Hashim Thaçi, ka ndërmarrë edhe një hap të rëndësishëm në drejtim të zbatimit të Pesë Prioriteteve Strategjike të Qeverisë për vitin 2009. Pas emërimit të Dr. Dejvid Klajn si këshilltar i jashtëm i Kryeministrit për ekonomi, këtë mbrëmje, mjeku i njohur shqiptaro-amerikan, Dr. Rifat Latifi, do të mbërrijë në Kosovë për të filluar angazhimin e tij si këshilltar i jashtëm i Kryeministrit për shëndetësinë.
Emërimi i Dr. Latifit në këtë pozitë është konkretizim i angazhimeve në sektorin e shëndetësisë, që është një ndër prioritetet strategjike të Qeverisë së Republikës së Kosovës.
Gjatë vizitës së tij të parë në këtë cilësi, Dr. Latifi do të zhvillojë takime të shumta për të marrë mendimet e të gjitha palëve të përfshira në shëndetësinë kosovare.
Nesër, ai do të vizitojë Qendrën Klinike Universitare të Kosovës dhe disa spitale nëpër Kosovë, për të mësuar më tepër në lidhje me vështirësitë me të cilat përballen pacientët dhe ofruesit e shërbimeve shëndetësore.
Të mërkurën, ai do të takohet me zyrtarë dhe profesionistë të sektorit të shëndetësisë për të diskutuar mënyrat e përmirësimit të infrastrukturës së kujdesit shëndetësor për nevojat e të gjithë kosovarëve.
Të enjten, Dr. Latifi do t’i diskutojë gjetjet e tij me Kryeministrin, me ç’rast do të shkëmbejnë ide rreth mënyrës më të mirë të ecjes përpara në rrugën e përmirësimit të përgjithshëm të shëndetësisë kosovare.
Pas këtij diskutimi, do të mbahet një konferencë e përbashkët për shtyp në lidhje me përfundimin e vizitës së parë të Dr. Latifit.
Dr. Latifi planifikon që të përdor këtë vizitë për të përforcuar njohuritë e tij për gjendjen dhe sfidat e shëndetësisë kosovare, në funksion të krijimit të një plani të hollësishëm strategjik për përmirësimin e kujdesit shëndetësor në vitin 2009, dhe më tutje.
Dr. Latifi është person i kualifikuar për këtë pozitë si një ekspert me përvoja globale, si njohës i problemeve të sektorit të shëndetësisë në Kosovë dhe po ashtu si një mjek i mirënjohur në nivel ndërkombëtar.
Ai ka diplomuar për mjekësi në Universitetin e Prishtinës dhe më pas është specializuar si kirurg në Universitetin e Prishtinës dhe në Universitetin Jejl, ku ka shërbyer si shef i specializantëve në Departamentin e Kirurgjisë.
Gjatë karrierës së tij të pasur, ka punuar edhe në universitete dhe qendra spitalore në Teksas, Filadelfi, Nju Jork dhe Virxhinia. Aktualisht, ai është Profesor i Kirurgjisë Klinike në Universitetin e Arizonës, ku mban disa poste të rëndësishme, duke përfshirë pozitën si Zwvendws Kryeshef pwr Marrwdhenie Ndwrkombwtare, dhe Zwvendws-Drejtor i Traumatolgjisw, Kujdesit Kritik Kirurgjik dhe Kirurgjise Emergjente, si dhe Drejtor i Shërbimeve të Telemjekësisë.
Dr. Latifi ka dhënë një kontribut të shquar akademik edhe përmes botimit të tetë librave dhe mbi 100 artikujve shkencor si autor ose bashkë-autor.
Dr. Rifat Latifi është një kosovar që ka kaluar jetën duke qenë i përkushtuar për mirëqenien e pacientëve në Kosovë dhe jashtë saj, si dhe me angazhime konkrete në funksion të reformimit të kujdesit shëndetësor në Kosovë.
