Shqipëria i hap rrugë modernizimit dhe fuqizimit të ushtrisë me një hua nga SHBA prej 302 milionë dollarësh

Qeveria shqiptare ka mbështetur në parim marrëveshjen për hua direkte me vlerë prej 302 milionë dollarësh ndërmjet Shqipërisë dhe SHBA-së, që ka për qëllim të mbështesë sektorin e mbrojtjes dhe sigurisë në vend, si dhe ta modernizojë atë.

Sipas tekstit zyrtar të vendimit, Republika e Shqipërisë në këtë transaksion financiar përfaqësohet nga autoritetet e linjës financiare, ndërsa pala amerikane përfaqësohet nga agjencia e specializuar për sigurinë e mbrojtjes.

“Këshilli i Ministrave vendosi miratimin, në parim, të marrëveshjes së huas direkte, ndërmjet Republikës së Shqipërisë, përfaqësuar nga Ministria e Financave, dhe Shteteve të Bashkuara të Amerikës, përfaqësuar nga Agjencia e Bashkëpunimit për Sigurinë e Mbrojtjes (DSCA), në kuadër të financimit të jashtëm ushtarak (FMF), me një hua në shumën totale prej 302 000 000 (treqind e dy milionë) dollarësh amerikanë, sipas tekstit që i bashkëlidhet këtij vendimi”, thuhet në vendimin e qeverisë së Shqipërisë.