Hys Shkreli, gazetari e moderatori më brilant në botën televizive shqiptare

Gazetari në foto është Hys Shkreli, njëri nga moderatorët më të mirë jo vetëm në ish Radiotelevizionin e Prishtinës, por në gjithë botën shqiptare.
Zëri i tij i thellë dhe me karaktere, finesat dhe inteligjenca e të shprehurit para kamerës, si dhe qëndrimi i tij brilant mbetet i pazëvendësueshëm dhe secilit shikues të Televizionit të Prishtinës do t’i ketë mbetur në kujtesë.
Hysi ka moderuar emisionin e parë me titull “Eureka”, pastaj emisionin “Në orët e vona”, si dhe emisionet tjera kulturore, në veçanti ato të zhanrit të muzikës që nga themelimi i Radiotelevizionit të Prishtinës në vitin 1976 e më pas.
Vëllezërit Shkreli kanë dhënë kontribut të jashtëzakonshëm në kulturën shqiptare. Për ata që nuk e dinë, Hysi është vëllai i shkrimtarëve Azem e Ymer Shkreli dhe i gazetarit veteran Adem Shkreli, ndërsa Afrimi vëllai i tyre i pestë, ishte ndër skiatorët më të dalluar në Kosovë.
Derisa Hysi është ndër gazetarët e parë të Televizionit të Prishtinës, ai po ashtu është ndër të parët që u largua drejt Shteteve të Bashkuara dhe tash më shumë se tridhjetepesë vjet jeton në New York.
Megjithëse me Hysin jam takuar vetëm një herë në jetën time, pasi kur ai punonte në Televizionin e Prishtinës unë isha fëmijë, postimin e bëj për respekt ndaj Tij, por edhe për mesazhin e vetëm se dikur jo çdokush mund të bëhej gazetar pa merita dhe falë lidhjeve politike!