Ndahen 1 milion euro për kuponë ushqimorë për familjet në nevojë

Qeveria në detyrë ka miratuar ndarjen e 1 milion eurove për zbatimin e masës “kuponë ushqimorë”, me qëllim mbështetjen e familjeve në gjendje të vështirë ekonomike në vend.

Kryeministri në detyrë, Albin Kurti, ka bërë të ditur se ky vendim është pjesë e pakos së ringjalljes ekonomike dhe synon ndihmën direkte për kategoritë sociale më të ndjeshme.

Sipas tij, mjetet do të transferohen nga programi i ringjalljes ekonomike në departamentin e skemave sociale dhe do të përdoren për mbulimin e kostove sipas thirrjes për përfituesit.

Qeveria po ashtu ka njoftuar se nga ky muaj do të rriten edhe shtesat për lehonat e papunësuara, nga 325 në 500 euro.

Autoritetet pritet të publikojnë së shpejti kriteret dhe procedurat për përfitimin e kuponëve ushqimorë, në mënyrë që familjet e interesuara të mund të aplikojnë.