Luftë apo paqe? Zbulohet përgjigjja që Trump i ka dhënë propozimit të fundit të Iranit

Irani ka marrë një përgjigje nga SHBA për propozimin e tij më të fundit për paqe, kanë bërë të ditur mediat shtetërore të lidhura me Iranin. Zëdhënësi i Ministrisë së Jashtme të Iranit tha se përgjigjja, e cila u dorëzua përmes Pakistanit, po shqyrtohet aktualisht, sipas agjencisë së lajmeve Tasnim.

SHBA ende nuk e ka konfirmuar zyrtarisht se i është përgjigjur Teheranit. Megjithatë, Presidenti Donald Trump raportohet se i tha “Kan News” të Izraelit të dielën se oferta e Iranit ishte “e papranueshme për të“, shkruan A2CNN.

Mediat shtetërore iraniane thanë se plani me 14 pika i Teheranit kërkonte që Uashingtoni të tërhiqte forcat e tij nga afër kufijve të Iranit, të përfundonte bllokadën detare të porteve iraniane dhe të ndaleshin të gjitha armiqësitë, përfshirë ofensivën e Izraelit në Liban.

Ai gjithashtu kërkonte që një marrëveshje mes dy vendeve të arrihej brenda 30-ditësh.

Mediat shtetërore iraniane shtuan se propozimi u bënte thirrje dy palëve ndërluftuese të fokusoheshin në “përfundimin e luftës” dhe jo në zgjatjen e një armëpushimi aktual.

Duke iu referuar propozimit, Trump shkroi në një postim në Truth Social dje në mbrëmje: “Ata ende nuk kanë paguar një çmim mjaftueshëm të madh për atë që i kanë bërë njerëzimit dhe botës gjatë 47 viteve të fundit.”

Duke folur me gazetarët po atë ditë në Palm Beach, Florida, ai tha se ende nuk e kishte shqyrtuar planin në detaje.

Shefi i Shtëpisë së Bardhë e ka lënë të hapur mundësinë e rifillimit të sulmeve ushtarake ndaj objektivave brenda Iranit.