Anëtari i Kryesisë së Lidhjes Demokratike të Kosovë (LDK), Muhamet Hamiti, ka bërë me dije se sot Kosova është në kurs konfrontimi me SHBA-të dhe BE-në.
Hamiti ka treguar se kjo po ndodh me fajin e Presidentes Vjosa Osmani dhe Kryeministrit Albin Kurti.
Në profilin e tij në Facebook, Hamiti ka shkruar se ata që e kanë quajtur ‘tigër prej letre’ BE-në dhe ‘naiv’ Sekretari Amerikan i Shtetit sot po ankohen për sanksione.
“#KREJTdheDREJT në kurs konfrontimi me SHBA-të dhe BE-në. Kush? Kosova që drejtues në politikë të jashtme i ka sot presidenten Osmani, kryeministrin Kurti dhe zëvendëskryeministrat Bislimi dhe Gërvalla-Schwarz. Për fajin e tyre – dhe këta flasin me një zë – Kosova është nën sanksione ndërkombëtare të atyre që protagonistët tanë arrogantë i quajnë ‘tigra prej letre’ dhe ‘naivë’. Merreni me mend, ‘tigër prej letre’ BE-ja, ‘naiv’ Sekretari Amerikan i Shtetit! Me këso gjuhe flasin pushtetarët tanë në emër të Kosovës”, ka shkruar ai.
Hamati ka vlerësuar se qytetarët e Kosovës e kanë mundësinë që në zgjedhjet e ardhshme t`i sanksionojnë drejtuesit aktual.
“Vuajtësit e sanksioneve, qytetarët e Republikës së Kosovës, e kanë mundësinë që në zgjedhjet nacionale të radhës t’i sanksionojnë drejtuesit e vet të papërgjegjshëm. Për të mirën e vet, sa më herët, aq më mirë”, është shprehur Hamiti.
