Dy emra që vazhdimisht jo zyrtarisht përmendeshin për të kandiduar në garën e PDK’së, Vlora Çitaku dhe Gent Cakaj, përfundimisht kanë deklaruar vetë se nuk do të jenë pjesë e kësaj gare.
Ish-ministri i Jashtëm i Shqipërisë, Gent Cakaj e mohoi një gjë të tillë, duke thënë se nuk do të jetë pjesë e garës me 3 korrik. Ai ka thënë se nuk synon që të bëhet pjesë e ndonjë partie politike në Kosovë.
“Një sqarim i vogël: E para, ashtu siç e kam sqaruar disa herë tashmë, unë nuk jam dhe nuk synoj të bëhem pjesë e asnjë partie politike në Kosovë. E dyta, unë jam tërhequr përkohësisht nga jeta publike deri në një vendim tjetër, për të cilin, me siguri, do t’iu njoftoj personalisht!”, ka shkruar ai.
Ndërsa edhe Ish-ambasadorja e Kosovës në SHBA, Vlora Çitaku, ka thënë se nuk do jetë pjesë e garës për kryetare të PDK’së.
Çitaku tha se ky vendim vjen si rezultat i shkëputjes së gjatë që kishte nga strukturat e këtij subjekti.
“Përgjigjja e shkurtë është jo. Nuk do të jem kandidate për kryetare të PDK-së dhe jo pse i frikësohem garës, e as pse entuziazmohem nga sondazhet, ndonëse është ndjenjë e mirë kur pëlqehesh nga publiku, por vendimet nuk i marr mbështetur nga ato premisa. E thashë në fillim që PDK-së nuk i duhet shpëtimtari, mesia, ky lloj koncepti i të menduarit politik duhet të çrrënjoset nga skena politike kosovare. Kosova nuk ka nevojë për gra të forta dhe burra të fortë, Kosova ka nevojë për institucione të forta dhe partitë politike janë institucione”, ka Çitaku në Rubikon.
Kujtojmë, që Kryesia e Partisë Demokratike të Kosovës ka marrë vendimin për mbajtjen e Konventës për zgjedhjen e kryetarit të ri.
Në një njoftim për media thuhet se Konventa e partisë është caktuar më 3 korrik 2021, ditë e shtunë. Siç theksohet, këtij vendimi i ka paraprirë një debat i gjatë në të gjitha nivelet e partisë që ka filluar pas përfundimit të zgjedhjeve të 14 shkurtit./Botapress./