Politikania serbe, Rada Trajkoviq, ka deklaruar se Qeveria e Serbisë dhe presidenti Aleksandër Vuçiq janë financuesit kryesorë të kriminelëve Zvonko Veselinoviq dhe Milan Radoiçiq, të cilët gjenden në listën e Departamentit të Thesarit të Shteteve të Bashkuara të Amerikë si mafiozë transnacionalë.
Serbja ka akuzuar edhe bashkësinë ndërkombëtare e Vuçiqin, duke thënë se kanë lejuar që integrimi i serbëve në institucionet e Kosovës të bëhet nga mafia.
“Ata kanë lejuar që integrimin e serbëve ta bëjë mafia. Dhe kur e bën mafia rezultati duhet të jetë fitimi. Në momenti kur u pa se po u kërcënohej fitimi, ata dolën në incidente, destabilizim të veriut të Kosovës dhe vetë Kosovës. Qeveria e Serbisë dhe z. Vuçiq, sipas mendimit tim, janë financuesit kryesorë të Veselinoviqit dhe Radioçiqit, të cilët përndryshe janë në listën e Departamentit të Thesarit të SHBA-së si kriminale apo mafiozë transnacionalë dhe të dyshuar për krimin ndaj Oliver Ivanoviqit. Përkundër gjithë kësaj, ata ende i marrin projektet më fitimprurëse nga Qeveria e Serbisë dhe Ana Bërnaboviqi”, – ka thënë Trajkoviq në një intervistë për “Deutsche Welle”.
Duke folur për largimin e serbëve nga institucionet e Kosovës dhe faktin se ata po kompensohen nga Qeveria e Serbisë, Trahjoviq tha se në këtë mënyrë Qeveria serbe detyron njerëzit të jenë besnikë.
“Është shantazh financiar dhe kontroll i serbëve që nënshkruajnë kontratë me punëdhënësin e tyre – Qeverinë e Serbisë. Në këtë mënyrë Qeveria serbe detyron njerëzit të jenë besnikë. Për aktivitetet e ardhshme, ata janë duke rekrutuar popullatën në drejtimin e kontrollit të tyre”,- shtoi ajo.
Trajkoviq tha se kryeministri i Kosocës, Albin Kurti, “…nuk e kupton apo ende nuk e pranon se mbijetesa e serbëve është shumë e rëndësishme dhe se modeli i Republika Sërpskas edhe për shkak të numrit të serbëve që jetojnë në Kosovë nuk është vërtetë diçka që do ta mundësojë bashkësia ndërkombëtare, por jep hapësirë për ta krijuar njëfarë modaliteti të mbijetesës funksionale dhe shumë ekspertë, që e kuptojnë zgjidhjen evropiane për probleme të tilla, po punojnë në këtë drejtim”.