Pezullimi i dialogut strategjik, kreu i LDK-së ftohet në takim në Ambasadën e SHBA-së

Kryetari i Lidhjes Demokratike të Kosovës, Lumir Abdixhiku, ka shkuar në Ambasadën e Amerikës në Prishtinë, pak kohë pasi SHBA-ja pezulloi dialogun strategjik me Kosovën.

Ai është parë duke hyrë në hapësirat e ambasadës rreth orës 15:00.

Pak më parë, kreu i LDK-së reagoi në Facebook duke thënë se “koha të bëhemi bashkë, t’i japim fund kësaj çmendurie politike”.

“Suspendimi i dialogut strategjik me SHBA-të paraqet pikën më të ulët të relacioneve të Kosovës me aleatin tonë strategjik dhe ekzistencial; si shtet i pavarur e sovran” shtoi ai.

Kreu i LDK’së adresoi kritika të ashpra ndaj Kurtit dhe VV’së.

“Shkatërruesit e shtetit, bllokuesit historik, shkelësit e Kushtetutës, ligjeve e normave morale njerëzore, kanë zgjedhur të ndërtojnë rrugëtimin e tyre mbi krizën e përhershme, mbi frikën e pashtershme dhe mbi fatkeqësinë e Republikës”, ka shkruar Kryetari i LDK’së.