Ngritet aktakuzë ndaj dy personave që shtireshin si mjekë në Vushtrri

Prokuroria Themelore në Mitrovicë ka ngritur aktakuzë ndaj dy personave, N.M. dhe P.I., të cilët dyshohen se për vite me radhë kanë ushtruar aktivitet mjekësor në mënyrë të kundërligjshme në qytetin e Vushtrrisë.

Sipas prokurorisë dy të pandehurit, pa asnjë kualifikim profesional, ofronin “trajtime” në ordinancën private “B. M.”, ku pretendonin se shëronin sëmundje të ndryshme përmes tabletave, çajrave dhe ujit, i cili sipas Prokurorisë, nuk i plotësonte as kushtet minimale për konsum njerëzor.

Tutje në njoftim tregohet se për një “kontroll” mjekësor ata kërkonin 100 euro, ndërsa për terapitë e ofruara pacientët paguanin deri në 30 euro – një mashtrim që shfrytëzonte gjendjen e rënduar shëndetësore dhe emocionale të qytetarëve.

Nuk mbaron me kaq – aktivitetet e tyre promovoheshin në rrjetet sociale, ku pretendohej se produktet e tyre “shëronin” sëmundje të ndryshme.

Sipas njoftimit të Prokurorisë, dy të pandehurit kanë pranuar fajësinë dhe janë dakorduar për një marrëveshje që parasheh dënim me gjobë dhe burgim, i cili megjithatë do të zëvendësohet me një shumë totale prej 70 mijë euro.