Britania i bën thirrje Serbisë: Bashkëpunoni për të sjellë para drejtësisë autorët e sulmeve ndaj KFOR-it dhe në Banjskë

Ambasadori britanik, Neil Holland ka shprehur shqetësim për tensionet e vazhdueshme në katër komunat veriore, si dhe për mbylljet e pakoordinuara të institucioneve që ofrojnë shërbime për komunitetet joshumicë.

Holland e mirëpriti Gerard McGurk si Shef të ri të Misionit të OSBE-së në Kosovë dhe përgëzoi punën e Misionit në një kontekst të ndërlikuar politik dhe të sigurisë.

“Ne bëjmë thirrje që Serbia të bashkëpunojë plotësisht me përpjekjet për të nxjerrë para drejtësisë ata që janë përgjegjës për këto akte”, theksoi Holland, duke iu referuar sulmeve ndaj KFOR-it dhe Policisë së Kosovës në vitin 2023, përfshirë incidentin në Banjskë dhe sulmin në kanalin Ibër-Lepenc.

Gjithashtu, ai nënvizoi rëndësinë e përmbushjes së angazhimeve të palëve në kuadër të Dialogut të ndërmjetësuar nga BE, përfshirë themelimin e Asociacionit të Komunave me Shumicë Serbe, duke paralajmëruar se moszbatimi i marrëveshjeve dëmton jetën e qytetarëve dhe stabilitetin rajonal.

Në fund, Holland përgëzoi përparimin e Kosovës në luftën kundër korrupsionit, por shprehu shqetësim për ndikimin politik në media dhe për sigurinë e gazetarëve, duke konfirmuar mbështetjen e Mbretërisë së Bashkuar për aktivitetet e OSBE-së në këtë fushë.

Ai e përmbylli fjalimin duke riafirmuar përkushtimin e Mbretërisë së Bashkuar për një Kosovë të pavarur dhe sovrane, si dhe angazhimin për paqen dhe bashkëpunimin në Ballkanin Perëndimor, përfshirë rolet e Dame Karen Pierce dhe organizimin e Samitit të Procesit të Berlinit në Londër këtë vjeshtë.