Menaxhmenti i RTK-së bëhet objekt i hetimit, drejtori e zëvendësdrejtori e nisën punën me marrëveshje të dyshimtë

Qysh në ditët e para, U.D i Drejtorit të Përgjithshëm të RTK-së është përfshirë në një marrëveshje të dyshimtë brenda Televizionit Publik. Ai e ka shpërblyer shokun e tij Arsim Halilin me 9328 euro, duke e tërhequr lëndën kundër tij në Gjykatën e Apelit dhe duke e ka vendosur më pas në pozitën e u.d. të Zëvendësdrejtorit të Përgjithshëm të RTK-së.

Ahmetxhelaj e ka tërhequr lëndën nga Gjykata e Apelit, ku RTK e kishte atakuar vendimin e Gjykatës Themelore në rastin e Arsim Halilit, e cila fillimisht kishte vendosur në favor të tij.

Rasti kishte të bënte me suspendimin dhe degradimin e Arsim Halilit nga pozita e redaktorit në gazetar nga komisioni disiplinor i RTK-së për shkak të ofendimit të komunitetit LGBT, pas një proteste të këtij komuniteti në Prishtinë në vitin 2016.

“Si qytetar i këtij vendi që mëton me shpërthy izolimin shumëvjeçar, i kam tri pyetje koncize: A është edhe LGBT, kusht për liberalizimin e vizave? Ky kusht a plotësohet me sapun, a pa sapun? Edhe e treta, për liberalizim vizash, a ma mirë me sakrifiku me demarkacion a me thobë?!”, kishte shkruar Halili në ditën e protestës së komunitetit LGBT.

LEXO EDHE KETE

Një tjetër goditje për Putin: Gjenerali dhe numri dy i Mbrojtjes jep dorëheqje

Menaxhmenti i RTK-së e kishte suspenduar dhe degraduar pas vendimit të komisionit disiplinor të RTK-së, për gjuhë ofenduese ndaj një komuniteti të caktuar dhe për shkelje të etikës dhe standardeve profesionale. Halili më pas ishte ankuar në gjykatë dhe në vitin 2018, pas një procesi gjyqësor, Gjykata Themelore kishte vendosur në favor të tij.

Me pas, RTK ishte ankuar në Gjykatën e Apelit, duke paraqitur fakte të reja për shkeljet që i kishte bërë Gjykata Themelore kundër RTK-së dhe ishte në pritje të vendimit në favor të RTK-së për shkak se shkeljet konsideroheshin evidente, publike dhe kishin zgjuar reagime të shumta, si nga shoqëria civile, ashtu edhe nga mediat kundër gjuhës ofenduese dhe homofobike të një redaktori të RTK-së. Megjithatë, këtë proces kundër Halilit tashmë e ka ndalur në gjysmë miku i tij, U.D. Drejtori i Përgjithshëm i RTK-së, Shkumbin Ahmetxhekaj.

Demokracia.com e ka siguruar marrëveshjen mes Ahmetxhekajt dhe Halilit, që të dy tashmë në krye të Televizionit Publik, ku dakordohet tërheqja e ankesës nga ana e RTK-së në Gjykatën e Apelit dhe pajtueshmëria për kompensimin e tij, pa e pritur fare vendimin e shkallës së dytë, duke e dëmtuar kështu RTK-në me mbi 9 mijë euro në mesin e krizës financiare që momentalisht ajo gjendet. Marrëveshja është nënshkruar më 28 janar të këtij viti. Në të thuhet se RTK dhe Arsim Halili janë pajtuar që të rregullojnë raportet e ndërsjella dhe të përmbyllin çështjet gjyqësore, pa vazhduar tutje në procese gjyqësore.

“RTK është pajtuar që i punësuari Arsim Halili do të vazhdoj punën e tij në Televizionin Publik, në pozitën redaktor i lajmeve në RTK1”, thuhet në marrëveshjen e siguruar nga Demokracia.com.

Ndërsa, Televizioni Publik, sipas kësaj marrëveshjeje, detyrohet që ta tërheqë ankesën në rastin e Halilit dhe t’ia paguajë në tërësi shumën sipas aktvendimit të Gjykatës Themelore.

“Arsim Halili dhe RTK deklarojnë se përveç kompensimit dhe kthimit në vendin e tij të mëparshëm të punës nuk kanë ndonjë kërkesë të çfarëdo natyre apo ndonjë pretendimi tjetër financiar ndaj njëra-tjetrës, lidhur me kërkesat që kanë pasur deri më sot dhe deri në lidhjen e kësaj marrëveshje”, thuhet në marrëveshjen në mes të Ahmetxhekajt dhe Halilit.

Demokracia.com ka mësuar se Ahmetxhekaj e ka njoftuar edhe Komisionin Parlamentar për Financa për këtë çështje dhe për çudi asnjëri nga deputetët në këtë komision nuk kanë reaguar.

Ahmetxhekaj e kishte tërhequr padinë nga Gjykata e Apelit vetëm pak ditë para se ta emëronte shokun e tij Arsim Halili në pozitën e Zëvendësdrejtorit të Përgjithshëm, pa e pritur as përfundimin e konkursit për Drejtor të Përgjithshëm.