Botapress 19 Maj – Kryetari i Aleancës për Ardhmërinë e Kosovës Ramush Haradinaj në prag të ardhjes së mërigmtarëve ka kërkuar nga Qeveria e Kosovës lehtësimin e masave anti covid.
Përmes një shkrimi në faqen e tij në Facebook ai ka kërkuar heqjen e tri masave që janë aktualisht në fuqi.
Reagimi i plotë:
Të nderuar qytetarë,Në Bashkimin Evropian dhe SHBA, ku ndodhet shumica dërmuese e mërgatës sonë, vaksinimi po shkon drejt përmbylljes.
Që nga muaji qershor, fillojnë edhe pushimet e fëmijëve nga shkollat, kështu që nga qershori e deri në shtator, mund të presim ardhjen e bashkëkombasve tonë në Atdhe.
Kosova duhet të jetë e përgatitur për ardhjen e familjarëve tonë. Shumica dërmuese e tyre do të jenë të vaksinuar kundër Covid-19, andaj, qëndrimi i tyre në vendlindje, duhet të jetë sa më pak i bezdisshëm dhe nga Kosova, ata duhet të kthehen me kujtimet më të mira.
Për këtë arsye, Aleanca i propozon Qeverisë së Kosovës, masat me sa vijon:
1.Heqjen e plotë të ndalimit të qarkullimit;
2.Heqjen e kufizimeve të orarit të punës së gastronomisë;
3.Heqjen e kufizimeve të aktiviteteve për organizimin e eventeve, përfshirë edhe hapjen e sallave të dasmave.
Këto masa, duhet të përcjellën me rregulla të reja për kujdes të shtuar shëndetësor si dhe monitorim më rigoroz përmes organeve përkatëse qeveritare e komunale.
Një qasje e tillë do të ndryshonte për të mirë edhe treguesit ekonomikë, në mungesë të instrumentave të tjerë financiarë.
Mërgimtarët si gjithherë, ashtu edhe tani, nëse iu ofrohen kushte të mira për ardhjen e tyre në Atdhe, do të jenë infuzion i mirëpritur dhe i domosdoshëm për ekonominë tonë që gjendet në krizë të thellë.
