37-vjeçari në Graçanicë e kërcënon me vrasje nënën, viktima del nga banesa dhe e denoncon

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë prindërit të cilët përjetojnë dhunë psikike e fizike nga fëmijët e tyre.

Kështu po dyshohet se ka ndodhur në një familje në Graçanicë, ku u arrestua një 37-vjeçar i dyshuar për dhunë në familje.

I dyshuari ka ushtruar dhunë psikike ndaj nënës së tij dhe e ka kërcënuar me vrasje.

Përballë kësaj situate, viktima është detyruar të largohet nga banesa dhe e ka denoncuar rastin në Polici, ku ka rrëfyer për dhunën sistematike që i biri ka ushtruar ndaj saj.

Si rezultat i raportimit, Policia e ka arrestuar të dyshuarin dhe i njëjti është dërguar fillimisht në Klinikën e Psikiatrisë, por nuk është pranuar për trajtim mjekësor.

Ndaj tij, Prokurori i Shtetit ka urdhëruar masën e ndalimit policor dhe inicimin e rastit për veprën penale ‘Dhunë në familje’.