35 milionë euro për super tenderin, qindra kompani në garë, 15 fitojnë

Ministria e Infrastrukturës ka mbyllur një nga tenderët më të mëdhenj për mirëmbajtjen e rrugëve nacionale dhe rajonale në vend, me vlerë mbi 35 milionë euro për tre vjet

Plot 91 grupe operatorësh ekonomikë hynë në garë për kontratat milionëshe që përfshijnë mirëmbajtjen verore dhe dimërore të rrjetit rrugor në gjithë territorin e Kosovës. Pas një procesi vlerësimi, 15 grupe operatorësh janë shpallur fitues dhe do të menaxhojnë segmentet përkatëse të rrugëve në nivel vendi.

Kontratat përfshijnë pastrimin e borës, kriposjen gjatë sezonit dimëror, riparime të asfaltit, mirëmbajtjen e sinjalizimit rrugor dhe ndërhyrje të tjera emergjente për të garantuar qarkullim të sigurt dhe funksional gjatë gjithë vitit.

Sipas njoftimit, përzgjedhja është bërë mbi bazën e çmimit më të ulët, ndërsa vlera totale e kontratave kap shifrën prej 35 milionë eurosh.