Zogaj: Humbja e besimit në zgjedhje na çon drejt një katastrofe të demokracisë

Lidhja Demokratike e Kosovës (LDK) ka vlerësuar si tejet të rëndësishme që të mbrohet procesi zgjedhor dhe të mos preket asnjë votë, e cila mund të krijonte mosbesim te qytetarët, dhe kështu kjo mund të jetë një katastrofë për demokracinë.

Deputeti i LDK-së, Alban Zogaj, në një intervistë dhënë për Ekonomia Online, tha se presin që institucionet përgjegjëse ta hetojnë rastin e “trenit bullgar” që ndodhi në Qendrën Komunale të Numërimit (QKN) në Mitrovicë të Jugut me fletëvotimet e raundit të dytë të zgjedhjeve lokale.

“Po, normalisht që ne si LDK jemi duke e përcjellë rastin e Mitrovicës me vëmendje të plotë, por qasja jonë si gjithmonë është t’ia lëmë organeve tona përgjegjëse që të merren me rastin. Ne i besojmë KQZ-së dhe organeve të tjera deri te Prokuroria, e cila është angazhuar në këtë rast për ta trajtuar në mënyrën më të mirë. Kur të kemi një konkluzion prej tyre se çfarë ka ndodhur me rastin e Mitrovicës, normalisht se ne do të dalim me qëndrimet tona, por ajo që mundem të them me përgjegjësi të plotë është se është e pa tolerueshme prekja e çdo vote në nivel të Kosovës, e natyrisht edhe në Mitrovicë. E dënojmë rëndë prekjen e çdo vote, sepse cenohet rëndë demokracia, dhe çka është e rëndësishme, cenohet një proces, i cili ishte një proces i mbarë i zgjedhjeve. Ne po mburremi në vendin tonë me zgjedhjet demokratike dhe të qeta, andaj duhemi të ruajmë këtë proces të shenjtë në vendin tonë”, tha ai.

Kërkesën që bëri PDK-ja që Mitrovica të shkojë në rivotim, Zogaj thotë se gara ishte më e fortë, por megjithatë vlerëson rezultatin që LDK-ja ka marrë në këto zgjedhje lokale.

“Por nuk e di çka të them, ndoshta që gara ishte më e ngushtë dhe më e fortë, ka mundur të ketë situata të tilla ku edhe zhurma është më e madhe, por secila votë është më e rëndësishme ku do që të shkojë ajo. Ne i kemi përcjellë dhe i kemi vëzhguar zgjedhjet në të gjitha qytetet e Kosovës, edhe në të gjitha fshatrat, dhe jemi të kënaqur me procesin zgjedhor të cilin e kaluam”, theksoi ai.

Deputeti i LDK-së kërkoi që hetimi i çështjes të jetë sa më i drejtë.

“Nuk jemi të prirur t’i komentojmë dhe paragjykojmë vendimet dhe veprimet e organeve përgjegjëse, çka kërkojmë është që të kryhen këto procedura në mënyrën më të drejtë të mundshme. Pastaj presim vendimet finale prej organeve, prej KQZ-së e tutje, në mënyrë që të shohim se çfarë ka qenë rasti i Mitrovicës”, shtoi Zogaj.

Zogaj theksoi se humbja e besimit në zgjedhje po e çon demokracinë në një katastrofë.

“Numërimi i votave po bëhet në praninë e kamerave dhe numërimi tani, me të vërtetë, është transparent në këto procese të fundit. Në atë rast atje, numërimi ka qenë në praninë e policëve, sepse situata ka qenë më e tensionuar dhe organet tona përgjegjëse e kanë parë të arsyeshme. Për ne është e rëndësishme që të mos cenohet demokracia dhe zgjedhjet e drejta në këtë vend. Pra, duhet të ruajmë këtë proces, kjo është shumë e rëndësishme për ne, ta mbrojmë procesin e zgjedhjeve, sepse humbja e besimit në zgjedhje na çon në një katastrofë për demokracinë tonë”, tha ndër të tjera Zogaj.

Në raundin e dytë të zgjedhjeve lokale që u mbajtën më 9 nëntor, në Mitrovicë të Jugut garuan kandidati i PDK-së, Arian Tahiri, dhe ai i Lëvizjes Vetëvendosje, Faton Peci, ku ky i fundit doli i pari në rezultatet preliminare të Komisionit Qendror të Zgjedhjeve.

Dyshimet për manipulim me vota erdhën pasi në QKN në Mitrovicë, teksa po bëhej verifikimi i fletëvotimeve, u hasën disa parregullësi që kishin të bënin me numrin serik. Pavarësisht se PDK-ja bojkotoi procesin e numërimit dhe rastin e paraqiti tek organet e rendit, në vend të ngjarjes dolën Policia dhe Prokurori i rastit. Por dyshime pati edhe për lidhshmërinë e prokurorit të rastit, Shpëtim Peci, i cili pas kundërshtimeve nga PDK-ja, u shoqërua edhe nga kryeprokurori i Prokurorisë Themelore të Mitrovicës, Njazi Rexha.

Verifikimi fillimisht u ndërpre, e një ditë pas, me urdhrin e Prokurorit Sahit Tmava, vazhdoi. Ndërkohë, KQZ-ja tashmë ka formuar edhe Komisionin për vlerësimin e fletëvotimeve.