Voziti 144 km/h në zonën ku kufizimi i shpejtësisë ishte 60 km/h, gjobitet 21-vjeçari në Shtime

Policia e Kosovës ka vazhduar me kontrollet në trafikun rrugor me qëllim të rritjes së sigurisë dhe parandalimit të aksidenteve, raporton Gazeta Sinjali.

Njësia e Komunikacionit Rrugor në Ferizaj, më 18 korrik 2025 rreth orës 18:00, ka ndaluar një veturë të tipit Golf me targa të huaja në rrugën transitore Davidovc-Belincë, në Shtime, për shkak të tejkalimit të shpejtësisë së lejuar.

Gjatë matjes me radar laserik, është konstatuar se shoferi, Q.Rr., 21-vjeçar, po ngiste automjetin me shpejtësi prej 144 kilometra në orë në një zonë ku kufizimi i lejuar është vetëm 60 km/h.

Për këtë kundërvajtje, Policia ka shqiptuar ndaj tij këto masa: Gjobë në vlerë prej 300 € dhe masë mbrojtëse – ndalim i drejtimit të mjetit motorik për 3 muaj.