Vit me “shumë lajme të mira për vendin” sipas Kurtit: kjo është top 10-shja e tij

Kryeministri në detyrë, Albin Kurti tha se ky vit po mbyllet me “shumë lajme shumë të mira” për vendin dhe qytetarët.

Në top listën e lajmeve të mira për vendin, sipas tij, janë shtesat, rritja e pensionit, forcimi i ushtrisë, e të tjera.

Postimi i Albin Kurtit në Facebook:

Po e mbyllim një vit me shumë lajme shumë të mira për vendin dhe qytetarët, përkundër sfidave.

Këto janë top 10 lajmet e mira të vitit 2025:

Rritja e shtesave për nënat lehona nga 170 euro në 325.9 euro dhe e pagesës së pushimit të lehonisë nga Qeveria prej 223 euro në 319.5 euro;

Rritja e pensionit bazik në 150 euro;

Forcimi i ushtrisë me dronë amerikanë Puma, dronë luftarakë turk Skydagger dhe sistemin antitank gjerman Panzerfaust 3;

4 njohje të reja, pasaportë edhe më e fuqishme në indekset ndërkombëtare dhe heqja e masave të padrejta të BE-së;

Ndërtimi i dy urave të reja mbi lumin Ibër në Mitrovicë, një për këmbësorë dhe një për vetura;

Përurimi i Depos së re Qendrore të Barnave, pas më shumë se 20 vjetëve;

Anëtarësimi me të drejta të plota në EQAR, pas përjashtimit në vitin 2018;

Vazhdimi i programit Kompakt të Korporatës së Sfidave të Mijëvjeçarit, 202 milionë dollarë grant nga shteti amerikan investim në sektorin e energjisë;

Bursa e Mobilitetit për Studentë që udhëtojnë për të ndjekur studimet, për herë të parë një mbështetje e tillë për studentë;

Kosova hiqet nga listat e FMN-së dhe Bankës Botërore të shteteve në Situata të Brishta dhe Konflikti.