Video-përgjimi që nxjerr zbuluar Sllamniku, i cili shprehej i bindur se shëronte autizmin me barna kafshësh

Konspiracionisti Arianit Sllamniku ka përfunduar në pranga, për shkak se po përdorte barna të kafshëve duke pretenduar se po e shëron autizmin tek fëmijët.

Në një video të publikuar nga LajmiNet, Sllamniku dëgjohet duke folur me një gura, e cila e shqetësuar thotë se burri nuk po i bindet që ta përdorë protokollin e barnave të përshkruara nga ai për fëmijën e tyre.

“A ki mundësi ti, veç një punë me bë, veç një punë na duhet me bë – veç me i thanë atij zotnisë me më thirrë në telefon. Veç qekaq”, i thotë ai gruas, teksa ajo ia kthen se bashkëshorti i saj është tip me të vjetrën e s’po e kupton. Ky ia kthen: “Çfarë moshe është ai?”, ndërsa ajo dëgjohet duke i thënë “as i vjetër as i ri”.

“Tek ky rast po u deshka me u bind veç baba, edhe tjerat kryhen krejt. Unë babës së tij ia jap veç 1 javë afat, brenda javës ai e sheh rezultatin, tani edhe baba edhe çkado që ka me i thanë ka me pranu”, thotë ai i bindur.

Kostoja për tu trajtuar tek Sllamniku ishte e kushtueshme, duke filluar nga 1500, 2000 apo edhe 4 mijë euro.

Theksojmë se, Prokuroria Themelore e Gjilanit, ka dorëzuar kërkesë për caktimin e paraburgimit ndaj Arianit Sllamnikut, i cili dyshohet për dy vepra penale “Ushtrim i kundërligjshëm i veprimtarisë mjekësore ose farmaceutike’ dhe ‘Eksperimente të kundërligjshme mjekësore dhe testime të barnave”.