Ulutash: KFOR u përforcua me 1,000 trupa pas sulmit në Banjskë

Sulmi terrorist në Banjskë dhe incidentet ndaj trupave të KFOR-it janë konsideruar të papranueshme nga NATO. Për t’u përgjigjur këtyre zhvillimeve, Aleanca Veriatlantike ka vendosur të përforcojë misionin e saj në veri të Kosovës me 1,000 trupa shtesë, si dhe të rrisë aktivitetet patrulluese pranë vijës kufitare administrative.

Komandanti i KFOR-it, Ozkan Ulutash, ka deklaruar se forcat e Aleancës po zhvillojnë patrullime të përbashkëta me Policinë e Kosovës në veri, si dhe patrullime të sinkronizuara me forcat e armatosura të Serbisë përgjatë vijës kufitare administrative.

Ai tha se situata po monitorohet nga afër dhe nuk janë vërejtur indikatorë që sugjerojnë ndonjë aktivitet të shtuar rreth AVN-së.

“Sulmi në Banjskë dhe sulmi kundër trupave të KFOR-it në Zveçan janë të papranueshme. NATO u përgjigj menjëherë. KFOR-i u përforcua me 1000 trupa shtesë, dhe KFOR-i shtoi aktivitete patrulluese pranë vijës kufitare administrative. Përfshirë patrullimet e përbashkëta me Policinë e Kosovës në veriun e Kosovës si dhe patrullimet e sinkronizuara mes KFOR-it dhe forcave të armatosura të Serbisë nëpër AVN. Ne nga afër kemi monitoruar situatën dhe nuk kemi parë ndonjë indikatorë që do të sugjeronte për ndonjë aktivitet të shtuar rreth AVN-së. Siç është thënë ne jemi në kontakt të rregullt në nivele të ndryshme me përfaqësuesit e organizatave të sigurisë në Kosovë dhe forcave të armatosura në Serbi”, theksoi Ulutash në një intervistë për Tëvë 1.