Si duhet të plotësoni fletëvotimet për zgjedhjet lokale? – tregon KQZ-ja

Komisioni Qendror i Zgjedhjeve (KQZ) ka dhënë udhëzime të detajuara për mënyrën e plotësimit të fletëvotimeve gjatë Zgjedhjeve Lokale të 12 tetorit, që përfshijnë zgjedhjet për Kryetarët e Komunave dhe për Kuvendet Komunale.

Nëpërmjet një videoje informuese, zëdhënësi i KQZ-së, Valmir Elezi, ka shpjeguar se votuesit do të përdorin dy fletëvotime të ndryshme. Fletëvotimi i parë, me kornizë të verdhë, është për zgjedhjet e kryetarëve të komunave dhe përmban emrat e kandidatëve, së bashku me subjektet politike që i përfaqësojnë. Votuesit duhet të vendosin një shenjë në katrorin pranë emrit të kandidatit të preferuar për kryetar komune.

Ndërsa fletëvotimi i dytë, me kornizë të kaltër, do të përdoret për zgjedhjet për Kuvendet Komunale, ku votuesit duhet të shënojnë zgjedhjen e tyre për anëtarët e këtyre kuvendeve.

KQZ kërkon nga të gjithë qytetarët të sigurohen që të plotësojnë fletëvotimet në përputhje me këto udhëzime, për të garantuar vlefshmërinë e votave të tyre në këto zgjedhje të rëndësishme.