Rama: Nga shtatori 12 shkolla do të funksionojnë me mësim tërëditor

Kryetari i Prishtinës, Përparim Rama, bëri të ditur se projektet e infrastrukturës dhe arsimit po ecin paralelisht në kryeqytet, duke ndikuar drejtpërdrejt në përmirësimin e trafikut dhe lehtësimin e jetës së qytetarëve.

Ai në intervistë për Ekonomia Online tha se deri në fund të kësaj jave do të përfundojnë punimet në disa segmente të rëndësishme rrugore, ndërsa ndërtimi i shkollave të reja dhe kalimi në sistemin e mësimit tërëditor do të kenë ndikim pozitiv afatgjatë.

“Tash vetëm kanë filluar punimet aty në rrugën A, po përfundojnë faktikisht punimet dhe deri në fund të kësaj jave do të jetë e gatshme për shërbim ndaj qytetarëve. Kjo pjesë e investimeve të ndryshme, pra i kemi me qindra investime në pjesë të ndryshme të kryeqytetit, ku që të gjitha do të bëhen bashkë aty ku edhe e kemi përmirësim të trafikut. Është një proces se jemi duke punuar shumë në gjitha pjesët, e kemi edhe unazën e brendshme, e kemi rrugën ‘Xhim Xhema’ apo rrugën A, kemi edhe ndërtimin e shkollave, e cila ka do të ketë impakt super pozitiv në momentin kur edhe ato ndërtohen. Pra, është një strategji multi-dimensionale që ka një impakt pozitiv pastaj në zhvillimin pozitiv të trafikut në kryeqytet”, tha Rama.

Ai shtoi se mësimi tërëditor është një prej reformave më të rëndësishme për qytetin, pasi lehtëson qarkullimin dhe ndihmon financiarisht familjet.

Rama paralajmëroi se nga shtatori 12 shkolla do të funksionojnë me mësim tërëditor dhe se deri në fund të mandatit të ardhshëm katërvjeçar, të gjitha shkollat e Prishtinës do të jenë pjesë e këtij sistemi, duke kursyer deri në 300 euro në muaj për ekonomitë familjare.

“Ne kemi edhe mësimin tërëditor që tash ju mundëson që prindërit mos të kenë nevoje me hip në makinë për t’i dërguar fëmijët në zona ku nuk kanë për shembull, e kanë fëmijën prej mëngjesi deri pasdite. Pra, nuk kanë nevojë të dalin prej punës të shkojnë t’i marrin dhe dërgojnë në shtëpi. Nuk kanë nevojë për përkujdesje me kujdestarë të ndryshëm, kur nuk janë ata në shtëpi e janë duke punuar. Pra, përveç mësimit tërëditor i ndihmon trafikut po ashtu edhe ekonomisë familjare deri 300 euro më shumë përfitojnë ekonomitë familjare çdo muaj të atyre që i kanë fëmijët në mësim tërëditor.
E tash prej shtatorit i kemi 12 shkolla me mësim tërëditor. Deri në fund të mandatit të ardhshëm katërvjeçar do t’i kemi të gjitha shkollat me mësim tërëditor”, tha kryetari i Prishtinës.