Qytetarët presin rezultat zgjedhor që nuk krijon bllokada institucionale

Procesi i votimit në qendrën më të madhe në Fakultetin e Filologjisë të Universitetit të Prishtinës ka filluar me kohë, ndërsa fluksi i njerëzve ende nuk ka nisur, raporton Ekonomia Online.

Menaxheri i kësaj qendre, Emanuel Gjolekaj, mbrapa kamerave tha se materiali zgjedhor është shpërndarë me kohë.

Qytetari Xhafer Brajshori për Ekonomia Online tha se pret rezultate pozitive nga këto zgjedhje.

“Presim mu përmirësu, me punu, mu bashku e jo me bllokada. Na kanë blloku me paga e me të tjera”, tha ai.

Sa i përket bllokadës mbi 10 muajsh dhe se a mund të pritet një gjë e tillë, Brajshori u shpreh optimist se nuk mund të ndodhë dhe se, sipas tij, Albin Kurti është i duhuri për të qenë në krye të Kosovës.

“Nuk mendoj për diasporën këtu, na jemi këtu, njeriu duhet me shku përpara. Kush është i zoti, le të shkon përpara e le të na shpëton. Albin Kurti, po më doket, është ma i forti krejt, po presim mirë”, tha ai.

Në këtë qendër votimi kanë të drejtë vote 6,791 qytetarë. Numri i votuesve në Prishtinë është mbi 219 mijë, ndërsa të regjistruar jashtë Kosovës janë mbi 7,500 qytetarë.

Sipas të dhënave nga Lista Votuese, numri i qytetarëve me të drejtë vote në vendvotime në Republikën e Kosovës është 1,999,204 votues, ndërkaq numri i qytetarëve që janë regjistruar për të votuar jashtë Kosovës është 77,086 votues.