Punëtori humbi jetën pas aksidentit me rrymë, arrestohet pronari i kompanisë “Linda Group” në Gjilan

Një ngjarje e rëndë ka ndodhur në Gjilan. Më 18 gusht 2025, rreth orës 12:00, në rrugën “Metush Krasniqi”, ka ndodhur një incident i rëndë në vendin e punës, ku i përfshirë ishte 23-vjeçari Lazar Simiq.

Sipas hetimeve të Njësisë së Hetimeve të Punës, Gjilan, në koordinim me Prokurorinë, është intervistuar dhe më pas ndaluar për 48 orë pronari i kompanisë “Linda Group” SH.P.K, Arjan Berisha, rreth 39-vjeçar, me dyshimin për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, sipas nenit 358 të Kodit Penal të Kosovës.

Fillimisht viktima ishte dërguar nga Emergjenca e Gjilanit në QKUK-Prishtinë për shkak të gjendjes së rëndë shëndetësore, mirëpo sot (19 gusht), rreth orës 06:45, ai ka ndërruar jetë si pasojë e lëndimeve të marra nga rryma elektrike. Trupi i pajetë është dërguar në Institutin e Mjekësisë Ligjore për obduksion, me urdhër të Prokurorit të Shtetit

Policia dhe Prokuroria kanë konfirmuar se hetimet lidhur me këtë rast tragjik janë duke vazhduar.